बारा क्षेत्र १ मा २० वर्षे ‘दुईदलिय चक्र’माथि प्रश्न—विकासको हिसाब माग्दै मतदाता

बारा, रामबाबु मेहता,
२०५६ सालदेखि बारा निर्वाचन क्षेत्र नं. १ मा नेकपा (एमाले) र नेपाली कांग्रेसले पालैपालो चुनाव जित्दै आएका छन्। संघीय प्रतिनिधिसभादेखि प्रदेशसभा र अधिकांश स्थानीय तहसम्म यी दुई दलकै प्रभाव रहँदै आएको छ। तर शिक्षा, स्वास्थ्य, कृषि, पूर्वाधार र रोजगारीका सूचकांकमा अपेक्षित सुधार नदेखिएको भन्दै स्थानीय स्तरमै असन्तुष्टि बढ्न थालेको छ।
स्थानीयवासीहरूका अनुसार सडक स्तरोन्नति, सिँचाइ विस्तार, गुणस्तरीय शिक्षालय र आधारभूत स्वास्थ्य सेवामा ठोस प्रगति हुन नसक्दा विकासका प्रतिबद्धता कागजमै सीमित भएको अनुभूति छ। युवाहरू रोजगारीको खोजीमा बाहिरिन बाध्य छन् भने किसानले मल, सिँचाइ र बजारको समस्या भोगिरहेका छन्।
यही पृष्ठभूमिमा आगामी निर्वाचनका लागि पुनः पुरानै अनुहारहरू अघि सारिएको भन्दै आलोचना चुलिएको छ। एमालेबाट अच्युत मैनाली र कांग्रेसबाट शम्भु बुढाथोकीलाई उम्मेदवार बनाउने तयारीप्रति केही मतदाताले “पुरानै राजनीति दोहोरिने संकेत” का रूपमा टिप्पणी गरेका छन्।
स्थानीय राजनीतिक विश्लेषकहरू भन्छन्, “विगत दुई दशकको नेतृत्वले अपेक्षित परिणाम दिन नसकेको अनुभूति जनस्तरमा बढ्दै छ। अब मतदाता घोषणापत्रभन्दा कार्यसम्पादनको मूल्याङ्कन गर्न चाहन्छन्।”
युवा मतदाताको भनाइ छ—अब खोक्रा भाषण र चुनावी आश्वासनभन्दा पारदर्शिता, जवाफदेहिता र नतिजामुखी नेतृत्व चाहिन्छ। उनीहरू परिवर्तन, इमानदार नेतृत्व र जनमुखी शासनको माग गरिरहेका छन्।
बारा–१ मा यसपटकको निर्वाचन केवल उम्मेदवारबीचको प्रतिस्पर्धा मात्र नभई, विगत २० वर्षको कार्यसम्पादनमाथिको जनमत परीक्षणका रूपमा हेरिएको छ। मतदाताले यसपटक के निर्णय लिन्छन् भन्ने चासो बढ्दो छ।