प्रहरी दिवसको उत्सवमा सञ्चारकर्मीको सांकेतिक विरोध : बारामा प्रहरी र पत्रकारबीच सम्बन्धमा तिक्तता

पत्रकारहरूको भनाइ अनुसार, एक पत्रकारले दिएको जाहेरीको आधारमा एसपी तामाङले अध्यक्ष सुबेदीलाई दुई दिनसम्म मानसिक दबाब दिए र जाहेरीकर्ताको पक्षमा खुला वकालत गरे। प्रहरी प्रमुखजस्तो जिम्मेवार पदमा रहेर उनले कानुनको समान व्यवहार नगरेको र पत्रकारमाथि “दम्भपूर्ण व्यवहार” देखाएको आरोप लगाइएको छ।

समाचार लेखेकै कारण लक्षित गरिएको आरोप

सामाजिक सञ्जालमा गरिएको गालीगलौजको विषयलाई कारण देखाइए पनि, वास्तविक कारण भने दशैंअघि अध्यक्ष सुबेदीले एसपी तामाङसम्बन्धी समाचार लेखेका कारण उनलाई लक्षित गरिएको सञ्चारकर्मीहरूको दाबी छ। पत्रकार महासंघले समाधान गर्ने विषयमा प्रहरी प्रमुखले गरेको हस्तक्षेपलाई पत्रकारहरूले “सासू कुटेर बुहारी तर्साउने” प्रवृत्तिको उदाहरणका रूपमा लिएका छन्।

अध्यक्ष सुबेदीले भने पत्रकार महासंघले कार्यक्रम बहिष्कार गर्ने औपचारिक निर्णय नगरेको बताए। तर, अधिकांश श्रमजीवी पत्रकारहरूले भने प्रहरी प्रमुखको व्यवहारप्रति असन्तुष्टि जनाउँदै कार्यक्रम बहिष्कार गरेका थिए।

‘प्रहरी मेरो साथी’ भन्दै प्रचार, तर व्यवहार विपरीत

पत्रकारहरूले ‘प्रहरी मेरो साथी’ जस्तो जनमुखी कार्यक्रम चलाउने संस्थाकै तर्फबाट पत्रकारहरूप्रति यस्तो व्यवहार हुनु दुःखद रहेको बताएका छन्। नेपाल प्रहरीको इतिहासमै बारामा पहिलो पटक पत्रकार महासंघले प्रहरी दिवसको कार्यक्रम बहिष्कार गरेको पनि उल्लेख गरिएको छ।

एक वरिष्ठ पत्रकारका अनुसार, पत्रकारहरूबीचको व्यक्तिगत विषयमा प्रहरी प्रमुखले रिसिबी साध्नु कानुनको गलत उपयोग हो। उनीहरूका अनुसार पछिल्लो समय प्रहरी प्रशासनले शान्ति सुरक्षाभन्दा बढी तस्करी र मिलेमतोका काममा चासो देखाएको भन्दै स्थानीयस्तरमा पनि असन्तुष्टि बढ्दै गएको छ।

यस घटनापछि बारामा प्रहरी र पत्रकार महासंघबीचको सम्बन्ध अत्यन्त चिसिएको बताइएको छ।