मोटर चलाउने क्रममा करेन्ट लाग्दा नैकाटोलाका ३२ वर्षीय युवकको ज्यान गयो

बारा । सिम्रौनगढ नगरपालिका–३ नयाँकटोलाका एक युवकको खेतमा पानी तान्ने क्रममा करेन्ट लागेर मृत्यु भएको छ। आफ्नै खेतमा सिँचाइका लागि पानी निकाल्न मोटर चलाउने क्रममा भएको विद्युत् दुर्घटनाले ३२ वर्षीय विजय दास ततमाको ज्यान गएको हो।
रामईश्वर दास ततमाका छोरा विजय बुधबार साँझ करिब ५ बजे खेतमा मोटरबाट पानी निकाल्ने क्रममा अचानक करेन्ट लागेर घाइते भएका थिए। घटनापछि उनलाई तत्काल उपचारका लागि सिम्रौनगढस्थित धर्मलाल क्लिनिकमा लगिएको थियो।
तर उपचारका लागि क्लिनिक पुर्‍याइएको केही समयमै चिकित्सकले उनलाई मृत घोषणा गरेका थिए। जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक मीनबहादुर घलेका अनुसार चिकित्सकले साँझ ५ः२० बजे विजयलाई मृत घोषणा गरेका हुन्।
सिँचाइका लागि खेतमा प्रयोग हुने विद्युतीय मोटर तथा तारमा हुने सामान्य लापरबाहीले समेत गम्भीर दुर्घटना निम्त्याउन सक्ने घटनाले देखाएको छ। विशेषगरी खेतबारीमा विद्युत् मोटर प्रयोग गर्दा तार, स्विच तथा मोटरको अवस्था जाँच नगरी सञ्चालन गर्दा जोखिम बढ्ने गरेको छ।
घटनाबारे प्रहरीले आवश्यक अनुसन्धान तथा घटनास्थलसम्बन्धी विवरण संकलन गरिरहेको जनाएको छ। स्थानीयका अनुसार खेतमा सिँचाइको कामका क्रममा विद्युत् सुरक्षामा पर्याप्त सावधानी अपनाउनुपर्ने देखिएको छ।