भारतीय कारमा चार पेस्तोल र एसएलआरका गोली बरामद, वीरगन्जमा सुरक्षा चुनौतीको संकेत

वीरगन्ज, १ असोज । वीरगन्जमा रोकिराखिएको भारतीय नम्बर प्लेटको कारभित्रबाट ठूलो परिमाणमा हतियार र गोली बरामद भएपछि सीमावर्ती क्षेत्रमा अवैध हतियार ओसारपसारको विषय फेरि चर्चामा आएको छ।
वीरगन्ज महानगरपालिका–१५ स्थित वास्तु बिहार चोक नजिक सडकमा बुधबार साँझ रोकिराखिएको भारतीय नम्बर प्लेटको कारबाट सशस्त्र प्रहरीले चार थान पेस्तोल र एसएलआरका ६ राउन्ड गोली बरामद गरेको हो।
सशस्त्र प्रहरी बल नेपालअन्तर्गत इन्टेलिजेन्स ब्युरोबाट खटिएको टोलीले कार खानतलासी गर्दा दुई थान सिक्सर पेस्तोल, दुई थान कटुवा पेस्तोल र एसएलआरका ६ राउन्ड गोली फेला पारेको जनाएको छ।
हतियारसहित कार नियन्त्रणमा लिएर थप अनुसन्धानका लागि जिल्ला प्रहरी कार्यालय पर्सामा बुझाइएको सशस्त्र प्रहरीले जनाएको छ।
तर, घटनाको सबैभन्दा महत्वपूर्ण पक्ष भने कारभित्र हतियार कसले राखेको थियो र ती हतियार कहाँबाट ल्याइएका थिए भन्ने प्रश्न बनेको छ। रोकिराखिएको भारतीय नम्बर प्लेटको कारभित्र एकैपटक चार थान पेस्तोल र एसएलआरका गोली फेला पर्नुले घटनालाई सामान्य अवैध ओसारपसारको घटनाभन्दा गम्भीर रूपमा अनुसन्धान गर्नुपर्ने अवस्था देखाएको छ।
सशस्त्र प्रहरीले कार र हतियार बरामद गरे पनि हालसम्म कार कसको हो, कसले प्रयोग गर्दै आएको थियो, कार त्यहाँ किन रोकिएको थियो तथा हतियार कसका लागि र कुन प्रयोजनका लागि ल्याइएको थियो भन्ने विषय सार्वजनिक गरेको छैन।
विशेषगरी पेस्तोलसँगै एसएलआरका गोली बरामद हुनुले अनुसन्धानको दायरा थप फराकिलो बनाएको छ। हतियारको स्रोत, सम्भावित ओसारपसारको बाटो, संलग्न व्यक्ति तथा त्यसको गन्तव्य पहिचान गर्नु अनुसन्धानको मुख्य विषय बन्ने देखिन्छ।
सीमावर्ती वीरगन्ज क्षेत्रमा भारतबाट आउने–जाने सवारीसाधनमाथि सुरक्षा निगरानी हुँदै आए पनि भारतीय नम्बर प्लेटको कारबाट यस्ता हतियार बरामद हुनुले सीमा क्षेत्रमा हुने अवैध गतिविधिमाथिको निगरानी र सूचना संयन्त्रबारे पनि प्रश्न उठाएको छ।
अब जिल्ला प्रहरी कार्यालय पर्साले कारधनी तथा प्रयोगकर्ताको पहिचान, हतियारको स्रोत र सम्भावित आपराधिक सञ्जालबारे अनुसन्धान अघि बढाउने अपेक्षा गरिएको छ।
कार भेटियो, हतियार भेटियो—तर हतियारको मालिक र गन्तव्य अझै खुलेको छैन। यही अनुत्तरित प्रश्नले वीरगन्जको यो हतियार बरामद प्रकरणलाई थप चासोको विषय बनाएको छ।