ठूला दलहरूको अहंकारले देश संकटमा परेको प्रचण्डको टिप्पणी

संविधान दिवसको अवसरमा शुक्रबार माओवादी पार्टी कार्यालय पेरिसडाँडामा आयोजित कार्यक्रममा बोल्दै प्रचण्डले तत्कालीन समयमा सङ्घीय लोकतान्त्रिक गणतन्त्रको संविधान निर्माणप्रति उदासीन ठूला दलहरूको रवैयाले वर्तमान जटिल अवस्था सिर्जना गरेको बताए।

प्रचण्डले माओवादीले प्रत्यक्ष निर्वाचित कार्यकारी राष्ट्रपति वा पूर्ण समानुपातिक निर्वाचन प्रणालीको पक्षमा निरन्तर वकालत गरेको स्मरण गर्दै हालैको जेनजी आन्दोलनले पनि त्यसको औचित्य पुनः पुष्टि गरेको दाबी गरे। उनले भने, “आवश्यक परे १० वर्षपछि संविधान पुनर्लेखन वा संशोधन गरेर सुधार गर्न सकिन्छ, जसले लोकतान्त्रिक संरचना अझ बलियो बनाउँछ।”

उनले भ्रष्टाचारविरुद्धका अभियान, संविधानसभाको नेतृत्व र सुशासनका पहललाई गलत रूपमा आलोचना गर्नु जनताप्रति र इतिहासप्रति विश्वासघात भएको आरोप लगाए। भाद्र २४ गतेको जेनजी आन्दोलनमा केही विध्वंस वा घुसपैठ भए पनि त्यसले आन्दोलनको ऐतिहासिक सन्देश कमजोर नपार्ने उनको भनाइ थियो।