सार्वजनिक जग्गा अतिक्रमण बारे बारा प्रशासनको १५ दिने सूचना आह्वान

१६ फागुन,बारा ।
सार्वजनिक जग्गा अतिक्रमणको सूचना वा प्रमाण उपलब्ध गराउन जिल्ला प्रशासन कार्यालय, बाराले १५ दिनको समयसिमा तोकेकोे छ ।
प्रमुख जिल्ला अधिकारी शशिधर घिमिरेले एक सूचना जारी गरी यस्तो आह्वान गरेका हुन् । जिल्ला भरी कसैको निजी हक दर्ता भोगचलनमा रहेको बाहेकको सरकारी वा सार्वजनिक स्वामित्वमा रहेको, ऐलानी, सन्धिसर्पन, गौचरन, घाट आदि जग्गाहरू कानुनविपरीत कसैले आफ्नो नाममा दर्ता गरेको रहेछ भने त्यस्को सूचना वा प्रमाण विवरण १५ दिनभित्र यस कार्यालयमा सोझै वा इमेलमार्फत् उपलब्ध गराउन सूचनामा उल्लेख गरिएको छ । यस्तै खास उद्देश्य वा प्रयोजनका लागि कुनै संस्थाको भोगचलन वा नियन्त्रणमा रहने गरी सुम्पेको वा जिम्मा दिएका सार्वजनिक र सरकारी जग्गाहरु बलजफ्ती अतिक्रमण वा कब्जा गरी निजी रूपमा दर्ता गरेको, दाखिला खारेज वा चलन चलाई हक हस्तान्तरण गरेको, लामो समयसम्म नियन्त्रण बाहिर रहने गरी लिजमा दिएको वा उद्देश्यविपरीत निजी कायम गरी गराई दुरुपयोग गरेको भए पनि सूचना दिन आह्वान गरिएको हो ।